Lífið í litum: Myndlistarfélag Árnessýslu blómstrar!
Myndlistarfélag Árnessýslu hefur verið ómissandi hluti af menningarlífi sýslunnar um árabil. Félagið var stofnað árið 1981 og hefur síðan þá verið lifandi vettvangur skapandi hugsunar, listrænnar tjáningar og gleði. Það eru því 44 ár síðan hópur áhugasamra listamanna sameinaðist með það markmið að efla myndlistarsköpun í sýslunni – og það er óhætt að segja að sú áætlun hafi tekist með prýði!
Í dag er félagið í fullum blóma og ýmislegt spennandi hefur verið að gerast undanfarin misseri. Fjöldi sýninga, námskeiða og opinna vinnustofa hefur gert það að verkum að fleiri hafa uppgötvað töfra listarinnar og látið til sín taka með pensla, blýanta og ýmsa aðra miðla.
Listin – gleðin sem smitar alla
List hefur einstaka hæfileika til að gleðja, vekja undrun og hreyfa við fólki á öllum aldri. Það er eitthvað óútskýranlegt við það að ganga fram hjá litríku málverki eða skemmtilegri myndskreytingu og finna hvernig bros læðist ósjálfrátt á varirnar.
Í verkum félagsmanna má finna allt frá skoplegum tilraunaverkum yfir í djúpar vangaveltur um lífið og tilveruna. Listin er ekki bara fyrir sérfræðinga eða þá sem hafa „auga fyrir list“ – hún er fyrir alla. Hvort sem þú ert 5 ára eða 85 ára, þá hefur myndlist þann einstaka eiginleika að snerta hjartað og vekja forvitni.
Myndlistarfélagið – lifandi og litríkur vettvangur
Félagið hefur verið ótrúlega virkt undanfarna mánuði. Opnar vinnustofur hafa verið haldnar á hverjum fimmtudegi (að undanskildum sumri og jólafríi) þar sem fólk kemur saman til að skapa, læra og njóta. Þar ríkir alltaf léttur og hlýlegur andi, penslar skvettast á striga, skissubækur fyllast af hugmyndum og kaffibollinn er aldrei langt undan.
Á árinu voru einnig haldnar fjölbreyttar sýningar, m.a. í Gallerý Gang á vinnustofu félagsins, í Tryggvagarði með sýningunni „Dýrin stór og smá“, í Skyrgerðinni með sýninguna „Gróska“ og svo „Lífið er allskonar“ á Mika. Allt saman sýningar sem vöktu mikla lukku meðal heimamanna og gesta.
Námskeið fyrir alla – sama hvort þú haldir á pensli í fyrsta skipti eða í þúsundasta skiptið
Eitt af markmiðum félagsins er að veita aðgang að listsköpun fyrir alla. Á árinu voru haldin fjölbreytt námskeið með hæfileikaríkum kennurum. Félagið bauð upp á námskeið í vatnslitamálun, teikningu, blandaðri tækni og fleira. Þar fengu þátttakendur tækifæri til að læra allt frá því að skissa einfaldar hugmyndir upp í að mála stór verk með olíu eða akrýl.
Hjördís Alexandersdóttir kenndi vatnslitamálun, Sara Vilbergs leiddi fólk í gegnum heim gelprents og klippimynda og Sigurlin Grímsdóttir kenndi tækni vatnslitanna. Þá tóku margir félagsmenn einnig þátt í námskeiðum sem félagið benti á, s.s. netnámskeiði í dúkristun hjá Siggu Melrós og námskeiðum hjá Guðrúnu Arndísi Tryggvadóttur.
Listin tengir okkur saman
Það sem gerir Myndlistarfélag Árnessýslu svo einstakt er samfélagið sem myndast hefur í kringum það. Hér koma saman einstaklingar úr öllum áttum – sumir sem hafa málað frá blautu barnsbeini og aðrir sem hafa aðeins leyft sköpunargleðinni að blómstra síðustu ár. Það sem sameinar alla er gleðin yfir að skapa og deila listinni með öðrum.
Listin er nefnilega ekki bara eitthvað sem hangir á veggjum eða stendur á súlum í listasöfnum. Hún er lífið sjálft í litum, áferð og formum. Hún fær okkur til að sjá heiminn með öðrum augum, dregur fram minningar, skapar nýjar tilfinningar og gefur okkur færi á að tjá það sem orð ná ekki utan um.
F.h. Myndlistarfélags Árnessýslu
Berglind Björgvinsdóttir, formaður
Endilega deilið þessari frétt með vinum og fjölskyldu og hjálpið okkur að dreifa töfrum listarinnar út um alla Árnessýslu!
